مسآء / صبآح الخير ..
تدوينة اليوم تخص الشوبينق ، رآح أتكلم عن شركة إعادة الشحن ( وورلد شيب ) وتجربتي الأولى معآهم ،
أول شي رآح أتكلم عن الشركة ،
تعتبر سعودية الأصل ، موقعهآ في أمريكآ - أوهآيو .. تخصص لكل عميل بريد أمريكي مع بعض المميزات ( رآح أذكرها بعد شوية ) .
قبل لا أسجل كنت مترددة بين الشركات خاصةً إن عادة أطلب مع أخواتي .. وهالمرة أول مرة رآح أطلب بنفسي ..
إحترت بين الشركآت وخدمآتها ، ووقت بحثي لقيت كود تخفيض للتسجيل بالوورلد شيب .
بدل لا يكون ب 24$ ( ٩٠ ريال سعودي تقريباً ) صاير مجآني ..
تحمست مع الكود وسجلت رُغم إن الشوب أند شيب كآن مجاني برضو وقتها لكن احتآج إني أرفع صورة للهوية وتكآسلت :)
سجلت بالموقع ، وأعطوني بريد أمريكي خآص فيني ..
كنت طآلبة ملآبس لِطفلي من موقع ، حطيت فيه العنوان وانتظرت لين تجهز الطلبية ..
وصلت الشحنة من الموقع لعنوآني تآريخ 18 آوغست ، وانتظرت يومين لين تم تسجيلهآ بالموقع ..
بعد ما تم حساب الوزن دفعت بالفيزا مبلغ الشحن ، وصآرت فيه مشكلة ..
علق الموقع معآيا .. واندفع المبلغ مرتين لكن ما انسحب من الفيزا شي ، وصار بعمليات الدفع في الموقع عمليتين بنفس المبلغ حالتها ( قيد التأكيد ) انتظرت يوم كآمل ما انسحب المبلغ
رآسلت الدعم عالإيميل بإن الموقع علق واندفع مرتين وكآن تجآوبهم سريع الحمدلله خلال دقيقة جآني الرد بإنهم حلو المشكلة،
فتحت الموقع مرة ثآنية ودفعت من أول وجديد لكن ما زالت نفس المشكلة
ما انسحب المبلغ وصار بالموقع ٣ عمليات دفع قيد التأكيد !!!
تواصلت معاهم مرة ثانية وكانت المشكلة إن لازم اسجل بيانات الفيزا بالملف الشخصي بعدين أدفع ،
وأيقونة التأكيد ما كانت تنضغط اذا جيت احفظها بالملف ! قآل لي الموظف إن هو بيضيفها بعد ما أرسل بيانات الفيزا ..
أرسلتها ومالقيت رد لمدة يومين !
رآسلتهم من إيميل ثاني وأرفقت صور المحادثة ورد علي نفس الموظف إنو راح يسويها .. :) وخلال ربع ساعة الحمدلله تم كل شي وخرجت الطلبية من عندهم ، بتاريخ 26 آوغست :) يعني 8 أيام ضاعت في الدفع والسبب تعليق موقعهم !
تآريخ 31 آوغست وصلت الشحنة منطقتي واستلمتها 5 سبتمبر من آرامكس ..
نجي لطريقة الشحن وكم كلفني ..
من عيوب الشركة إنها تحسب الوزن عن طريق الوزن الحجمي ، يعني الطول x العرض x الارتفاع
وهالطريقة مكلفة خاصة لو كآنت طلباتك كثيرة
تفآجآت من هالشي بعد ما وصلت طلبيتي عندهم ، لكن الحمدلله وقت ما كنت اتواصل معاهم عشان الدفع اكتشفت انهم مسوين عرض عالوزن إنهم يحسبون الوزن الفعلي بدون الحجمي .. وهالشي وفّر علي كثير ..
طبعاً بمآ إني طالبة ملابس أطفال كان وزن شحنتي قليل .. 6 بآوند
كلفتني بالشحن على آرامكس الاقتصادي 55.99$
وطلبت تأمين عالشحنة 2.52$
واستخدمت كوبون تخفيض وانخصم من المبلغ 11.20$
مجموع الشحن النهآئي 47.31$ ( 178 ريآل تقريباً )
إنطباعي عن الشركة :
بما إن أول طلب ما أقدر أحكم عالخدمة ، لكن نسبياً كانت ممتازة لو كنت فآهمة طريقة الدفع ما كآن حصل التأخير
مميزات الشركة :
- تعطيك بريد أمريكي تستخدميه للمواقع اللي ما تشحن دآيركت لدولتك أو الشحن دآيركت يعتبر أغلى فيها ..
- خآصية التجميع ..
يعني لو طآلبة من أكثر من موقع يجمعوها لك ويشحنوها مرة وحدة
- رسوم الاشتراك مرة وحدة عند التسجيل .
- التخلص من الصناديق ، ( رآح تخفف عليك وزن كثير ) ، التأمين عالشحنة ، التغليف الإضافي ، تصوير الشحنة والتجهيز المستعجل .
- وأخر شي تجآوبهم السريع ،
عيوب الشركة :
- احتساب الوزن الحجمي :/
- رسوم على تصوير الشحنة وإعادة التغليف ..
- الإلزام بتسجيل بيانات الفيزا وحفظها في الموقع كبطاقة افتراضية عشآن يتم الدفع :)
هل رآح أتعامل معاهم مرة ثانية ؟
أكيد بمآ إن عندهم خآصية التجميع ،
إن شآء الله آستفدتو من تجربتي معآهم
ولو حآبين أتكلم في تدوينة منفصلة عن طريقة التسجيل والشرح للموقع آكتبولي بالتعليقآت .